AMNESIAS

Ando cunha farinxite nos dedos e unha amnesia caprichosa

que non lembra que hai uns días,

estas lerias máis eu, fixemos 6 anos.

Estou recapitulando os bicos en latas de conserva.

CaRa A "Joven poeta-Xoel López"

SABORES

Perdo moitos versos no coche,  sobre todo cada vez que freo.

Hoxe descubrín que a ela, a maiores do arroz, sabíalle tamén a vida.

CaRa A "A.Boba-Hagamos algo antes de morir"

BICOS SALGADOS

Cada vez que falaba dela poñíase triste.Aínda non sabia que mollar os pés do corazón fora unha maneira coma outra de mollar o corpo enteiro.

Andaba viaxando nas témporas , derrapando en barras de garitos que marcaban o norte, disparando aos malos cos ollos pechados, apertando dentes de sucre, buscando as manchas de aceite nas curvas.

O seu corpo ulía a mar que deixa na lingua restos de sal e el, sempre fora de interior.
Repetían cancións por deporte.

CaRa A "Xoel López-Tierra"

ONDE ESTÁS?

Estou agardando pola autodeterminación da miña sombra,

plebiscito dos teus beizos mediante,

camiño do teu corpo.

Estou agardando por ese guión esquecido

onde os malos sempre gañan un sorriso

malgastando vida.

Agora que sabemos que podemos repetir

pero nunca será igual

podemos reincidir

na batalla perdida de bicarnos.

Se o mundo decide vivir de aluguer na supervivencia,

serás a raíña

da república do respirar por vontade popular.

Nunca son fácil,

nada é fácil,

neste vivir de grises 

que intentan pasar por laranxas.

Perdinme camiño da meta

nun fraude de promesas

que ofertan abrentes que esvaran

na zona sucia.

Son todo aquel

que debes evitar

se non queres respirar,

acelerando.

CaRa A-"Abraham Boba-Hombre perdido"

BOAS NOITES E BOA SORTE

Fitar unha constelación de lunares nas túas costas, cazar dragóns con versos asimétricos, beber un mar de ron aos teus pés, notar como perdemos en silencio...suturando os beizos, censurando as verbas, hipotecando os bicos,mordendo a vida.

Hoxe erguinme republicano e merquei unha coroa de princesa para poñela aos teus pés.

Sempre dis que non teño prezo como francotirador pero que deixo moito que desexar en campo aberto, peiteando a melancolía á fronte dun exercito de derrotas.

O que ti non sabes, é que sempre xogo asubiando coas balas marcadas.

CaRa A "Lo venidero-Albertucho"

CORASÓNS

Agora tan só nos queda querida, sachar

unha horta urbanizable con vistas ao mar.

CaRa A "Me he perdido-N.Vegas/Cristina R"

UNHA (de faros)

Enfrontar a miña cabeza e o meu corpo coa túa cabeza e o teu corpo, mesturar as gañas, matarte a deshora sen faro, alugar o triángulo das bermudas e perder un avión forman parte, dunha banda sonora sen lugar nin tempo.

Algo acontece e non sei o que é.

CaRa A "Algo me aleja de ti-Quique Gonzalez"