ENEMIGO ÁS PORTAS

Estou por facerme

un ERE de madrugada,

nas ganas,

na falta de sono,

neste non parar

para chegar a ningures.

Enviarche unha carta de amor

ten un aquel vintage

que mata os bicos

pegados con chicle no papel.

Somos unha bomba sen detonador,

verbas a fondo perdido,

un gol cantado a tombos

nun partido de veteranos.

Os gladiadores fan a manicura

coa espada das súas vítimas

mentres ti ,xogas a dispararme,

con pompas de xabón.

Isto xa non é guerra

nin mundial.

CaRa A "EME-Leiva"